2026-yil 23-fevral kuni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi Oliy oʻquv yurtidan keyingi taʼlim institutining 1-sonli yigʻilishi boʻlib oʻtdi. Mazkur yigʻilish 2026-yil II chorak uchun mustaqil izlanuvchilikka (PhD/DSc) talabgorlarni ixtisoslik boʻyicha suhbatdan oʻtkazishga bagʻishlandi.
Yigʻilishda komissiya raisi va aʼzolari ishtirokida talabgorlarning ilmiy salohiyati, tanlangan dissertatsiya mavzularining dolzarbligi hamda ixtisoslik yoʻnalishiga muvofiqligi atroflicha koʻrib chiqildi. Suhbat jarayoni ochiq va ilmiy-tanqidiy muhitda tashkil etildi.
Jumladan, 08.00.07 – “Moliya, pul muomalasi va kredit” ixtisosligi boʻyicha 3 nafar talabgor suhbatdan oʻtdi. Talabgorlar oʻz dissertatsiya mavzularining nazariy-metodologik asoslari, tadqiqotning ilmiy yangilik jihatlari, amaliy ahamiyati va kutilayotgan natijalar haqida suhbat tashkil etildi. Komissiya aʼzolari tomonidan moliya tizimidagi zamonaviy transformatsiya jarayonlari, moliyaviy instrumentlar samaradorligi, bozor mexanizmlarini takomillashtirish hamda xalqaro tajriba implementatsiyasi masalalari yuzasidan qator savollar berildi.
Shuningdek, 08.00.12 – “Mintaqa iqtisodiyoti” ixtisosligi boʻyicha 1 nafar talabgor suhbatda ishtirok etdi. Ushbu yoʻnalish doirasida hududiy rivojlanish omillari, mintaqaviy iqtisodiy salohiyatni oshirish mexanizmlari, kambagʻallikni qisqartirish va resurslardan samarali foydalanish masalalari muhokama qilindi. Talabgor tomonidan tadqiqotning nazariy asoslari, amaliy takliflari va kutilgan ijtimoiy-iqtisodiy samarasi boʻyicha atroflicha tushuntirish berildi.
Suhbatlar jarayonida dissertatsiya mavzularining dolzarbligi, ilmiy muammoning qoʻyilishi, tadqiqot metodologiyasining asoslanganligi hamda ixtisoslik pasportiga mosligi alohida baholandi. Komissiya aʼzolari tomonidan talabgorlarning ilmiy tafakkuri, tahlil qilish qobiliyati va mustaqil tadqiqot olib borish salohiyati yuqori baholandi.
Yigʻilish yakunida mustaqil izlanuvchilikka talabgorlarning hujjatlari va suhbat natijalari belgilangan tartibda rasmiylashtirilishi qayd etildi.
Mazkur tadbir oliy oʻquv yurtidan keyingi taʼlim tizimida ilmiy salohiyatni mustahkamlash, yosh tadqiqotchilarni qoʻllab-quvvatlash va iqtisodiyot sohasida ilmiy izlanishlarni ragʻbatlantirishda muhim ahamiyat kasb etdi.
