2026-yil 10-mart kuni Toshkent shahrida “International School of Finance Technology and Science” (ISFT) instituti hamda Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi oʻrtasida hamkorlik toʻgʻrisida memorandum imzolandi. Mazkur hujjat ikki muassasa oʻrtasida ilmiy-tadqiqot faoliyatini rivojlantirish, taʼlim va innovatsion jarayonlarni qoʻllab-quvvatlash hamda ilmiy salohiyatni mustahkamlashga qaratilgan muhim tashabbus sifatida eʼtirof etildi.
Tadbirni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi iqtisodiyot fanlari doktori, professor Xudoyqulov Sadirdin Karimovich ochib berdi. Tadbirda markaz doktorantlari hamda ilmiy xodimlari faol ishtirok etdilar. ISFT institutidan ISFT instituti rektori Gʻulomov Ibroxim Rustamovich hamda ISFT Biznes va menejment tadqiqotlari ilmiy markazi direktori Gavhar Isamutdinova qatnashdilar. Uchrashuv davomida tomonlar oʻrtasida hamkorlik istiqbollari, qoʻshma ilmiy tadqiqotlar olib borish imkoniyatlari hamda ilmiy-amaliy loyihalarni amalga oshirish masalalari yuzasidan fikr almashildi.
Memorandumga muvofiq, tomonlar kadrlar tayyorlash sifatini oshirish, amaliy va fundamental ilmiy tadqiqotlarni rivojlantirish, zamonaviy bilim va tajribalarni almashish hamda ilmiy salohiyatni mustahkamlash borasida oʻzaro hamkorlikni yoʻlga qoʻyishga kelishib oldilar. Hamkorlik doirasida ilmiy seminarlar, konferensiyalar, davra suhbatlari va treninglar tashkil etish, qoʻshma ilmiy loyihalar va tadqiqotlar olib borish, shuningdek ilmiy maqolalar, tezislar va tahliliy materiallarni birgalikda tayyorlash kabi faoliyat yoʻnalishlari belgilab olindi.
Shuningdek, memorandumda taʼlim, ilm-fan va innovatsiyalar integratsiyasini mustahkamlash, ilmiy xodimlar, tadqiqotchilar va ekspertlar oʻrtasidagi hamkorlikni kengaytirish, bakalavriat, magistratura hamda doktorantura bosqichlari uchun dolzarb ilmiy tadqiqot yoʻnalishlarini shakllantirish masalalariga alohida eʼtibor qaratildi. Tomonlar ilmiy grantlar va xalqaro tadqiqot loyihalarida hamkorlikda ishtirok etish orqali ilmiy izlanishlar samaradorligini oshirishni maqsad qilgan.
Mazkur memorandum ikki tashkilot oʻrtasida uzoq muddatli ilmiy hamkorlikni rivojlantirish, iqtisodiyot sohasidagi ilmiy tadqiqotlarni chuqurlashtirish hamda innovatsion tashabbuslarni qoʻllab-quvvatlashga xizmat qilishi kutilmoqda.