Toshkent davlat iqtisodiyot universiteti huzuridagi «O‘zbekiston iqtisodiyotini rivojlantirishning ilmiy asoslari va muammolari» ilmiy-tadqiqot markazi hamda universitetning «Moliya va moliyaviy texnologiyalar» kafedrasi hamkorligida «Moliya bozorini rivojlantirishning ustuvor yo‘nalishlari, zamonaviy tendensiyalari va istiqbollari» mavzusida IV respublika ilmiy-amaliy konferensiyasi tashkil etildi.
Tadbirda Toshkent davlat iqtisodiyot universiteti Ilmiy ishlar va innovatsiyalar bo‘yicha prorektori, professor Gulnora Abduraxmanova, «O‘zbekiston iqtisodiyotini rivojlantirishning ilmiy asoslari va muammolari» ilmiy-tadqiqot markazi direktori, professor Sadirdin Xudoyqulov, O‘zbekiston Respublikasi Vazirlar Mahkamasi huzuridagi Biznes va tadbirkorlik oliy maktabi professori To‘lqin Boboqulov, O‘zbekiston Respublikasi Bank-moliya akademiyasi «Investitsiyalar va kapital bozori» kafedrasi mudiri, professor Samariddin Elmirzayev, shuningdek, TDIU professor-o‘qituvchilari, mutaxassislar, ilmiy xodimlar hamda izlanuvchilar ishtirok etdi.
Konferensiyada jahon moliya bozorida yuz berayotgan global beqarorliklarning milliy moliya bozoriga taʼsirini kamaytirish, iqtisodiyotni modernizatsiyalash, iqtisodiy o‘sishni taʼminlash hamda inflyatsiyani pasaytirish maqsadida investitsiyalarni jalb qilish zarurligi masalalari muhokama qilindi. Professor-o‘qituvchilar, mutaxassislar va tadqiqotchilar ushbu yo‘nalishda ilmiy-amaliy takliflar bilan qatnashib, milliy moliya bozorining iqtisodiyotdagi ahamiyatini oshirish muammolari yuzasidan fikr almashdilar.
Maʼlumot o‘rnida, konferensiya uchun 300 ga yaqin material kelib tushgan bo‘lib, ularning 176 tasi saralab olingan va ilmiy to‘plam sifatida nashr etilgan. Mazkur materiallar yaqin kunlarda xorijiy maʼlumotlar bazalarida indekslanishi kutilmoqda.
Konferensiya yakunida faol ishtirok etgan tadqiqotchilar tashakkurnoma va esdalik sovg‘alari bilan taqdirlandi.
