2026-yil 27-fevral kuni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi Kengashining 2-sonli majlisi boʻlib oʻtdi. Majlisda markaz faoliyatining ustuvor yoʻnalishlari, strategik vazifalari hamda 2026-yilga moʻljallangan ilmiy-amaliy rejalar atroflicha muhokama qilindi. Jumladan, markazning 2026–2030-yillarga moʻljallangan rivojlanish strategiyasi koʻrib chiqilib, uni tasdiqlash toʻgʻrisida qaror qabul qilindi. Ushbu strategiya markaz ilmiy salohiyatini yanada mustahkamlash, fundamental va amaliy tadqiqotlar samaradorligini oshirish, innovatsion loyihalar sonini koʻpaytirish, xalqaro hamkorlik aloqalarini kengaytirish hamda raqamli iqtisodiyot, hududiy rivojlanish va demografik jarayonlar boʻyicha tadqiqotlarni chuqurlashtirishni nazarda tutadi.
Shuningdek, Oʻzbekiston Respublikasi Prezidenti Shavkat Mirziyoyev tomonidan 2026-yilning “Mahallani rivojlantirish va jamiyatni yuksaltirish yili” deb eʼlon qilinishi munosabati bilan markazda ilmiy-amaliy chora-tadbirlar rejasini ishlab chiqish masalasi ham koʻrib chiqildi. Unda mahallalar iqtisodiy salohiyatini oshirish, aholi bandligi va daromadlarini koʻpaytirish, hududlarda ijtimoiy-iqtisodiy jarayonlarni ilmiy tahlil qilish hamda mazkur yoʻnalishlarda seminar va konferensiyalar tashkil etish kabi vazifalar belgilandi. Majlisda markazning 2026-yilda yangi fundamental, amaliy va innovatsion loyihalar tanlovida faol ishtirok etishi, grant mablagʻlarini jalb qilish va loyihalarni xalqaro talablar asosida tayyorlash boʻyicha tayyorgarlik ishlarini kuchaytirish zarurligi taʼkidlandi.
Kun tartibidan oʻrin olgan yana bir muhim masala markaz sektorlari va oliy taʼlim muassasalari oʻrtasida taʼlim sifatini oshirishga qaratilgan hamkorlik dasturini tasdiqlash boʻldi. Ushbu dastur doirasida ilmiy tadqiqot natijalarini taʼlim jarayoniga joriy etish, professor-oʻqituvchilar ilmiy faolligini ragʻbatlantirish hamda talabalarni ilmiy loyihalarga keng jalb qilish choralari belgilandi. Shu bilan birga, 2026-yil II chorak uchun mustaqil izlanuvchilikka (PhD/DSc) talabgorlarning ixtisoslik boʻyicha oʻtkazilgan suhbat natijalari koʻrib chiqilib, tegishli qarorlar qabul qilindi.
Majlisda, shuningdek, Innovatsion rivojlanish agentligi tomonidan moliyalashtirilayotgan AL-8624042651-sonli “Oʻzbekiston aholisi 2050-yilgacha prognozining GAT texnologiyasiga asoslangan xaritasini ishlab chiqish” mavzusidagi amaliy loyihaning yakuniy hisoboti tinglandi. Loyiha doirasida mamlakat aholisi demografik prognozlari ishlab chiqilgani, geoaxborot texnologiyalari asosida interaktiv xarita yaratilgani hamda hududiy rejalashtirish va strategik qarorlar qabul qilish uchun ilmiy-amaliy tavsiyalar tayyorlangani qayd etildi. Majlis yakunida markaz faoliyatiga oid boshqa tashkiliy va ilmiy masalalar ham muhokama qilinib, tegishli qarorlar qabul qilindi. Mazkur majlis markazning ilmiy faoliyatini tizimli tashkil etish, uning strategik rivojlanishini taʼminlash va mamlakat iqtisodiyotini ilmiy asosda qoʻllab-quvvatlash borasida muhim ahamiyat kasb etdi.
