Joriy yilning 10-iyun kuni Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida “Ishlab chiqarish kuchlarini oqilona taqsimlash va hududlarni kompleks rivojlantirish” sektori tomonidan xalqaro davra suhbati tashkil etildi. Mazkur davra suhbati mavzusi “Jahon iqtisodiyoti va xalqaro savdodagi zamonaviy tendentsiyalar, tashqi savdo faoliyatini moslashtirish va suverenlashtirish strategiyalari” deb nomlanadi. Asosiy yo`nalish, jahon iqtisodiyoti va xalqaro savdoni rivojlantirishning dolzarb masalalariga bag‘ishlandi. Ilmiy davraga Rossiya Federasiyasida xizmat ko‘rsatgan fan arbobi, Rossiya Fanlar akademiyasining muxbir a’zosi, Butunrossiya tashqi savdo akademiyasi, bozor tadqiqotlari ilmiy tekshirish instituti direktori, iqtisod fanlari doktori, professor Andrey Nikolaevich Spartak, Toshkent davlat iqtisodiyot universitetining “Makroiqtisodiy siyosat va prognozlashtirish” va “Jahon iqtisodiyoti” kafedralari professor-o‘qituvchilari hamda “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi ilmiy sektor xodimlari, doktorantlari faol ishtirok etdilar. Ilmiy davra suhbatida jahon iqtisodiyoti va xalqaro savdoni rivojlantirishning dolzarb masalalari, shuningdek jahon iqtisodiyoti va xalqaro savdodagi joriy tendentsiyalar tahlil qilindi, O’zbekistonning tashqi savdo faoliyatini rivojlantirish strategiyalarini ishlab chiqish, O‘zbekiston va boshqa mamlakatlarning fan va ta’lim muassasalari o‘rtasidagi hamkorlik kabi muhim masalalar atroflicha muhokama qilindi.
