AL-9925025442-son “Eksportga yo‘naltirilgan ishlab chiqarish zonasini tashkil qilish” mavzusidagi amaliy tadqiqot loyihasi doirasida loyiha ijrochilari 2026-yil 28-sentyabr – 3-oktyabr kunlari Belarus Respublikasiga xizmat safarida bo‘ldi. Safar davomida Belarus davlat universiteti Biznes maktabi (sb.bsu.by) bilan ilmiy-amaliy hamkorlik masalalari bo‘yicha muzokaralar o‘tkazildi.
Muzokaralarda loyihaning ikki ustuvor yo‘nalishi bo‘yicha birgalikdagi tadqiqotlar istiqbollari ko‘rib chiqildi.
Birinchi yo‘nalish eksportni rivojlantirish strategiyalari va hududiy brendlarni shakllantirish. Tomonlar hududlarning eksport salohiyatiga asoslangan strategiyalarni ishlab chiqish bo‘yicha tajriba almashdi. Shuningdek, hududiy brendlarni shakllantirish uchun marketing dasturlarini tayyorlash hamda mahalliy ishlab chiqaruvchilarning xalqaro bozorlarga chiqish mexanizmlarini takomillashtirish masalalari muhokama qilindi. Belarus tomonining eksportni qo‘llab-quvvatlash institutlari, sanoat klasterlari va mahsulotlarni tashqi bozorlarda ilgari surish amaliyoti O‘zbekiston hududlarida eksportga yo‘naltirilgan ishlab chiqarish zonalarini tashkil etishda qo‘llanilishi mumkin bo‘lgan tajriba sifatida qayd etildi.
Ikkinchi yo‘nalish tashqi iqtisodiy aloqalarni rivojlantirish va xalqaro iqtisodiy integratsiya. Muzokaralarda O‘zbekiston va Belarus o‘rtasidagi savdo-iqtisodiy hamkorlikni kengaytirish imkoniyatlari ko‘rib chiqildi. Xususan, Yevroosiyo iqtisodiy ittifoqi bozoridagi istiqbolli segmentlarni aniqlash, eksport mahsulotlarining ixtisoslashuvini asoslash hamda kooperatsion zanjirlar va sanoat hamkorligi orqali qo‘shimcha qiymat yaratish mexanizmlari muhokama qilindi. Tomonlar hududlarning qiyosiy ustunliklarini baholash va ularni tashqi bozorlar talabi bilan muvofiqlashtirish bo‘yicha qo‘shma tahliliy ishlarni olib borish maqsadga muvofiq ekanini ta’kidladi.
Safar yakunlari bo‘yicha qo‘shma ilmiy tadqiqotlar, tajriba almashinuvi, ilmiy nashrlar tayyorlash va xodimlar malakasini oshirish yo‘nalishlarida hamkorlikni davom ettirishga kelishib olindi. Olingan natijalar loyiha doirasida ishlab chiqilayotgan eksportga yo‘naltirilgan hududiy rivojlanish bo‘yicha tavsiyalarda inobatga olinadi.
