2026-yil 22-oktabr kuni Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida “O‘zbekistonda ichki va tashqi migratsiya jarayonlari: muammolar va yechimlar” mavzusida respublika ilmiy-amaliy konferensiyasi bo‘lib o‘tdi. Tadbir markazning 13-qavatdagi majlislar zalida soat 10:00 da boshlandi.
Konferensiya AL-9124104481-sonli “GAT texnologiyasi asosida O‘zbekistonda migratsiya va mehnat resurslariga oid xarita ishlab chiqish” amaliy loyihasi doirasida tashkil etildi. Uning maqsadi ichki va tashqi migratsiyaning iqtisodiy va ijtimoiy xususiyatlarini ilmiy jihatdan tahlil qilish, mavjud muammolarni aniqlash va ularni hal etishga qaratilgan amaliy takliflar ishlab chiqishdan iborat bo‘ldi.
Konferensiyani markaz direktori, professor S.K. Xudoyqulov ochdi. Kirish so‘zlari bilan, Fuqarolarni (yoshlarni) chet tillariga o‘qitish va xorijiy davlatlarda ishlashga maqsadli tayyorlash markazi bosh mutaxassisi B.A. Qodirov hamda professor B.X. Umurzakov chiqdi.
Chiqishlarda migratsiyani ko‘chish sifatida emas, balki iqtisodiy, ijtimoiy va demografik jarayon sifatida o‘rganish zarurligi ta’kidlandi. Mehnat resurslaridan samarali foydalanish, aholi bandligini ta’minlash va hududlar o‘rtasidagi iqtisodiy tafovutlarni qisqartirish dolzarb vazifalar sifatida qayd etildi. Migratsiya oqimlarini hududlar kesimida baholash va asoslangan qarorlar qabul qilish uchun geografik axborot tizimlari texnologiyalariga tayanib raqamli xaritalar yaratish tashabbusining ahamiyati alohida ko‘rsatildi. Yosh olimlar, doktorantlar va mustaqil tadqiqotchilarni bu yo‘nalishdagi izlanishlarga jalb etish ham muhim vazifa deb belgilandi.
Dastur doirasida quyidagi ma’ruzalar tinglandi:
B.X. Umurzakov, “O‘zbekiston aholisining migratsiya oqimlarini muvofiqlashtirish davlat siyosatini 2030–2035-yillarda yanada takomillashtirish”;
S.N. Abdurahmonov, “GAT texnologiyalari asosida O‘zbekiston migratsiya jarayonlarining raqamli xaritalarini tuzish”;
S.P. Qurbonov, “Mehnat mobilligining kambag‘allik darajasiga ta’siri: xalqaro tajribalar va saboqlar”;
Sh.R. Xamdamov, “Mintaqaviy iqtisodiy omillarning O‘zbekistonda ichki migratsiyaga ta’siri”;
Z.A. Qodirova, “O‘zbekistonda tashqi mehnat migratsiyasining shakllanishi va kengayishida kasbiy ta’lim hamda mehnat bozori o‘rtasidagi nomuvofiqlik”;
S.S. Gaziyeva, “Ichki va tashqi migratsiya bo‘yicha ma’lumotlar yuritish: muammo va yechimlar”.
Konferensiya materiallari to‘rtta sho‘ba bo‘yicha jamlangan: globallashuv davrida mehnat migratsiyasi jarayonlari, migratsiya jarayonlarini boshqarish tizimini takomillashtirish, ichki va tashqi mehnat migratsiyasi munosabatlari hamda mehnat migrantlarini ijtimoiy qo‘llab-quvvatlash va reintegratsiya qilishdir. Ular O‘zbekistonning yetakchi oliy ta’lim muassasalari, ilmiy-tadqiqot markazlari, vazirlik va idoralar vakillari, doktorantlar, mustaqil izlanuvchilar va iqtidorli talabalar tomonidan tayyorlangan.
Tadbir yakunida davra suhbati tavsiyalari muhokama qilindi. Konferensiya natijalari migratsiya sohasida ilmiy asoslangan qarorlar qabul qilish, ilm-fan va amaliyot integratsiyasini mustahkamlash hamda kelgusi tadqiqotlar uchun asos bo‘lib xizmat qiladi.
