Toshkent davlat iqtisodiyot universitetida tashkil etilgan Taraqqiyot strategiyasi I xalqaro forumi sohaning koʻplab bilimdonlarini birlashtirdi. Inson kapitalini rivojlantirishning strategik yoʻnalishlari doirasida tashkil etilgan uchrashuvda 50 nafardan ortiq xorijlik ekspert ishtirok etdi.
Forumda uchta asosiy masala atroflicha tahlil qilindi. Pandemiyadan keyingi davrda global iqtisodiyotni rivojlantirish tendensiyalari, transformatsiya jarayonida moliya va buxgalteriya hisobi arxitekturasini takomillashtirish hamda raqamli iqtisodiyotni rivojlantirishning muhim yoʻnalishlari ikki kun davomida muhokamalar markazida boʻldi.
Forumda keyingi yillarda Oʻzbekiston va Fransiya oʻrtasidagi iqtisodiy munosabatlar har tomonlama shakllanib borayotgani alohida qayd yetildi. “Bu, albatta, mamlakatingiz rahbariyati tomonidan olib borilayotgan iqtisodiy islohotlarning ijobiy natijasidir. Boshqa davlatlar vakillari qatori fransiyalik ishbilarmonlar, sarmoyadorlar, olimlar, axborot texnologiyalari vakillarining yurtingizda erkin faoliyat yuritishi uchun barcha sharoit muhayyo. Biz bundan doimo mamnunmiz”, dedi fransiyalik professor Tyerri Joel.
Forumning yana bir muhim ishtirokchisi, Kembrij universiteti professori Siddharth Saksena oʻz fikrini quyidagicha izohladi: “Bugungi qizgʻin munozaralar jarayonida Oʻzbekistonning taraqqiyot strategiyasi bosh mavzu qilib tanlangani muhim ahamiyatga ega. Forumda ilgari surilgan fikrlar, shubhasiz, mamlakatingizning butun mintaqa miqyosida dadil rivojlanish yoʻnalishlarini belgilashga xizmat qiladi. Chunki ushbu ilmiy anjumanda oʻrtaga tashlangan takliflar mintaqani iqtisodiy rivojlantirishga yoʻnaltirilganligi, shu orqali jahon iqtisodiy taraqqiyotiga sabab boʻlishi atroflicha koʻrsatib berildi. Bu borada dadil rivojlanayotgan Oʻzbekistonning oʻz oʻrni va ahamiyati beqiyosdir”.
Mamlakatimizda faoliyat olib borayotgan xorijiy davlatlar elchixonalari, AQSH, Buyuk Britaniya, Rossiya, Fransiya hamda Indoneziya davlatlarining nufuzli taʼlim dargohlari professorlari isteʼmolchilar talabining pasayishi, mintaqadagi geosiyosiy vaziyat taʼsirini yumshatish borasida iqtisodiy hamjamiyat olimlari olib borayotgan faoliyatni katta qiziqish bilan kuzatdi.
Tadbirning ikkinchi kuni ham qizgʻin muhokamalar bilan davom etdi. Unda jadallik bilan kechayotgan raqamlashtirish jarayoni yangi iqtisodiyotni vujudga keltirayotgan bir paytda biznesda samarali marketing kompaniyalari ishini jadallashtirish, minimal xarajat qilib maksimal foyda olish, mahsulot hamda xizmatlarni muvaffaqiyatli sotishning samarali usullari taqdim etildi.
Hozirda koʻplab fundamental loyihalarni oʻz ichiga olgan Yangi Oʻzbekiston taraqqiyot strategiyasi asosida mamlakatimiz ichki infratuzilmasida sezilarli islohotlar amalga oshirilmoqda. Iqtisodiyotni yanada rivojlantirish va liberallashtirishga yoʻnaltirilgan makroiqtisodiy barqarorlikni mustahkamlash, yuqori iqtisodiy oʻsish surʼatlarini saqlab qolish, milliy iqtisodiyotning raqobatbardoshligini oshirish shular jumlasidan.
Shuningdek, qishloq xoʻjaligini modernizatsiya qilish va jadal rivojlantirish, iqtisodiyotda davlat ishtirokini kamaytirish boʻyicha institutsional va tarkibiy islohotlarni davom ettirish, xususiy mulk huquqini himoya qilish va uning ustuvor mavqeini yanada kuchaytirish boʻyicha samarali ishlar amalga oshirilmoqda.
Feruz HAKIMOV,
Toshkent davlat iqtisodiyot universiteti
moliya va buxgalteriya hisobi fakulteti
3-bosqich talabasi
