Toshkent davlat iqtisodiyot universiteti huzuridagi «O‘zbekiston iqtisodiyotini rivojlantirishning ilmiy asoslari va muammolari» ilmiy tadqiqot markazi sektor mudiri Qodirov Abdurashid Madjitovich 2025-yil 16-aprel kuni tabarruk 70 yoshni qarshiladi.
Abdurashid Madjitovich Qodirov 1955-yil 16-aprelda Toshkent shahrida tug‘ilgan. U 1972-yilda Moskva oziq-ovqat sanoati texnologiyasi institutining iqtisod-muhandislik fakultetiga o‘qishga kirib, 1977-yilda muvaffaqiyatli tamomladi.
Ushbu davr mobaynida Qodirov A.M. ilmiy faoliyatini Iqtisodiy tadqiqotlar ilmiy-tadqiqot institutida boshladi, so‘ngra ko‘plab nufuzli ilmiy va pedagogik lavozimlarda faoliyat yuritdi. 1984-yilda nomzodlik, 1991-yilda esa doktorlik dissertatsiyasini muvaffaqiyatli himoya qilgan.
Abdurashid Madjitovich Qodirov 1992-yildan beri professor unvoniga ega bo‘lib, O‘zbekiston Respublikasi Vazirlar Mahkamasi huzuridagi Oliy attestatsiya komissiyasining iqtisodiy mutaxassisliklar bo‘yicha ekspert kengashi raisi, Toshkent davlat texnika universiteti, Malayziya-O‘zbekistonning «Biznes boshqaruv fakultetida» dekan hamda O‘zbekiston Respublikasi Fanlar Akademiyasining Iqtisod instituti direktori sifatida faoliyat yuritgan.
Shu bilan birga, u ilmiy maslahatchilik faoliyati bo‘yicha ko‘plab shogirdlar yetishtirib kelmoqda. Hozirda uning 40 nafar shogirdi iqtisodiyot fanlari bo‘yicha falsafa doktori (PhD) ilmiy darajasiga ega bo‘lishgan, bitta shogirdi esa iqtisod fanlari doktori (DSc) ilmiy darajasiga erishgan.
Qodirov A.M. tomonidan bir nechta darslik va monografiyalar chop etilgan, Scopus bazasidagi jurnallarda 5 dan ortiq ilmiy maqolalari e’lon qilingan. U xalqaro loyihalar (TEMPUS, ITC, UNDP, World Bank, ABR) rahbari va ishchi guruh aʼzosi sifatida ham faoliyat olib borgan.
Qodirov Abdurashid Madjitovichning ilmiy-pedagogik faoliyati davomida isteʼdodli yoshlarni iqtisodiyot tarmoqlarining dolzarb muammolarini tadqiq qilishga yo‘naltirishga alohida eʼtibor qaratilmoqda.
