Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida 2026-yil 1-chorak yakunlari boʻyicha ilmiy tadqiqotchilar faoliyatini chuqur tahlil qilishga bagʻishlangan navbatdagi ishchi komissiya yigʻilishi boʻlib oʻtdi.
Mazkur yigʻilishda markazda faoliyat olib borayotgan tayanch doktorantlar (PhD), doktorantlar (DSc), stajyor-tadqiqotchilar hamda mustaqil izlanuvchilarning shaxsiy ish rejalari ijrosi, amalga oshirilgan ilmiy tadqiqotlar va erishilgan natijalar atroflicha koʻrib chiqildi.
Yigʻilishni Ishchi komissiya raisi, markaz direktori, iqtisod fanlari doktori, professor S.K. Xudoyqulov olib bordi. U oʻz soʻzida mamlakatimizda oliy taʼlimdan keyingi taʼlim tizimini takomillashtirish, ilmiy kadrlar tayyorlash sifatini oshirish hamda tadqiqotlarning amaliy ahamiyatini kuchaytirish bugungi kunning ustuvor vazifalaridan biri ekanligini taʼkidladi.
Oʻzbekiston Respublikasi Prezidentining 2017-yil 20-apreldagi “Oliy taʼlim tizimini yanada rivojlantirish chora-tadbirlari toʻgʻrisida”gi PQ-2909-son qarori, Oʻzbekiston Respublikasi Vazirlar Mahkamasining 2017-yil 22-maydagi “Oliy oʻquv yurtidan keyingi taʼlim tizimini yanada takomillashtirish chora-tadbirlari toʻgʻrisida”gi 304-son qarori, Oʻzbekiston Respublikasi Oliy va oʻrta maxsus taʼlim vazirining 2019-yil 26-iyundagi 572-sonli buyrugʻi bilan tasdiqlangan “Doktorantlar maktabi toʻgʻrisida”gi nizom hamda sohani tartibga soluvchi boshqa meʼyoriy-huquqiy hujjatlar talablaridan kelib chiqib, tadqiqotchilar faoliyatini muntazam monitoring qilish, ularning ilmiy salohiyatini baholash va natijadorligini oshirish muhimligi qayd etildi.
Yigʻilish doirasida markaz direktorining 2026-yil 11-martdagi 24-sonli buyrugʻiga muvofiq tashkil etilgan monitoring ishchi guruhi tomonidan amalga oshirilgan oʻrganishlar natijalari taqdim etildi. Unda har bir tadqiqotchining yakka tartibdagi shaxsiy rejasi bajarilishi, nashr etilgan ilmiy ishlari, amaliy natijalari va kelgusidagi rejalari tahlil qilindi.
Muhokamalar jarayonida 1-, 2- va 3-kurs tayanch doktorantlar, doktorantlar hamda stajyor-tadqiqotchilarning 2026-yil 1-chorakdagi faoliyatiga alohida eʼtibor qaratildi. Shuningdek, mustaqil izlanuvchilarning yillik rejalari ijrosi ham tanqidiy-tahliliy asosda koʻrib chiqildi.
Maʼlumotlarga koʻra, ayni chorakda markazda jami 39 nafar tadqiqotchi ilmiy faoliyati oʻrganildi. Ulardan 3 nafari doktorant (DSc), 17 nafari tayanch doktorant (PhD), 4 nafari stajyor-tadqiqotchi va 15 nafari mustaqil izlanuvchilardan iborat. Barcha tadqiqotchilar monitoring jarayonida faol ishtirok etib, oʻz faoliyatlari yuzasidan hisobot taqdim etdilar.
Yigʻilish yakunlari boʻyicha tadqiqotchilar faoliyati samaradorligini yanada oshirish, ilmiy ishlar sifatini yaxshilash, xalqaro ilmiy nashrlarda faollikni kuchaytirish hamda amaliy natijadorlikka erishish boʻyicha tegishli tavsiyalar berildi.
Mazkur monitoring tadbirlari ilmiy faoliyatni tizimli ravishda tashkil etish, tadqiqotchilarning masʼuliyatini oshirish va mamlakatimizda ilmiy-tadqiqot ishlarining sifat jihatidan yangi bosqichga koʻtarilishiga xizmat qiladi.
