TDIUda taraqqiyotning eng muhim yo‘nalishlaridan biri – milliy iqtisodiyotni isloh qilish, ayniqsa, barqaror rivojlanishni ta’minlash maqsadida amalga oshirilayotgan izchil jarayonga bag‘ishlangan anjuman bo’lib o’tdi. Mazkur tadbir O‘zbekiston Respublikasi Prezidentining 2022-yil 28-yanvardagi “2022-2026-yillarga mo‘ljallangan Yangi O‘zbekiston ning taraqqiyot strategiyasi to‘g‘risida”gi PF-60-son Farmoni ijrosini ta’minlash maqsadida tashkil etildi.
O‘zbekistonda iqtisodiy islohotlarni yanada chuqurlashtirish, mamlakat iqtisodiyotini jahon iqtisodiyotiga integratsiyalash, ichki va tashqi bozorlarda raqobatni mustahkamlash korxonalarning barqaror rivojlanishini boshqarishning samarali mexanizmlarini shakllantirish va har tomonlama rivojlantirishni talab qiladi.
Bu, o‘z navbatida, inson kapitalini ko‘p qirrali rivojlantirish, aholi turmush darajasini yuksaltirish kabi sohalarni qamrab oladi.
Raqobat muhitini yaratish va moliyaviy xizmatlar bozorlarida raqobatni rivojlantirish dolzarb yo‘nalish bo‘lgan moliyaviy infratuzilmani sifat jihatidan o‘zgartirish va faoliyat samaradorligini oshirishni talab qiladi.
Amaliyot va ilmiy tadqiqotlar shuni ko‘rsatadiki, bu muammolarning barchasi mintaqaviy kontekstda, asosan, obyektiv tabiiy, iqlim va demografik sharoitlarning mintaqalar bo‘yicha farqlanishi tufayli turli darajada namoyon bo‘ladi.
Ta’kidlash joizki, Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi ilmiy tadqiqotining asosiy yo‘nalishlari ana shu muammolarni hal etishga bag‘ishlangan. Konferensiyaning turli yo‘nalishlari ishi esa aynan shu muammolarni ko‘rib chiqish, ularni hal etish bo‘yicha ilmiy asoslangan tavsiyalar ishlab chiqishga bag‘ishlangan.
