2025-yil 10-oktabr kuni Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida “Milliy iqtisodiyotni isloh qilish va barqaror rivojlantirish istiqbollari” mavzusidagi respublika ilmiy-amaliy konferensiya o‘tkazildi.
Mazkur ilmiy anjuman O‘zbekiston Respublikasi Prezidentining 2022-yil 28-yanvardagi PF–60-son Farmoni — “2022–2026-yillarga mo‘ljallangan Yangi O‘zbekistonning taraqqiyot strategiyasi to‘g‘risida” hamda 2023-yil 11-sentyabrdagi PF–158-son Farmoni — “O‘zbekiston–2030 strategiyasi to‘g‘risida”hujjatlarida belgilangan ustuvor vazifalar ijrosini ta’minlash maqsadida tashkil etildi.
Tadbirda O‘zbekiston Respublikasi Oliy ta’lim, fan va innovatsiyalar vazirligi vakillari, Davlat aktivlarini boshqarish agentligi huzuridagi Xususiylashtirish va davlat aktivlarini boshqarish muammolarini tadqiq etish markazi, Prezident huzuridagi Davlat boshqaruvi akademiyasi, Iqtisodiyot va moliya vazirligi huzuridagi Byudjet-soliq tadqiqotlari instituti hamda Toshkent davlat iqtisodiyot universiteti professor-o‘qituvchilari, ilmiy xodimlari va doktorantlari faol ishtirok etdilar.
Konferensiya doirasida mamlakat iqtisodiy islohotlarining nazariy asoslari, milliy iqtisodiyotning barqaror rivojlanish omillari hamda yangi iqtisodiy paradigmalarning amaliy joriy etilishi masalalari atroflicha muhokama qilindi. Tashkiliy qo‘mita tomonidan taqdim etilgan ilmiy tezislar orasidan 175 ta maqola va tezis tanlab olinib, ular 4 ta sho‘ba bo‘yicha konferensiya to‘plamiga kiritildi.
Konferensiyada O‘zbekistonning yetakchi iqtisodchi olimlari, tahlil markazlari vakillari, yosh tadqiqotchilar va doktorantlar o‘z ilmiy izlanishlari natijalari bilan o‘rtoqlashdilar. Qizg‘in fikr almashuv va bahs-munozaralar shaklida kechgan sessiyalar yakunida eng faol ishtirokchilarga sertifikatlar topshirildi.
