2026-yil 7-may kuni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida “Milliy iqtisodiyotni isloh qilish va barqaror rivojlantirishning ilmiy asoslari” mavzusida respublika ilmiy-amaliy konferensiyasi boʻlib oʻtdi.
Mazkur konferensiya Oʻzbekiston Respublikasi Prezidentining 2023-yil 11-sentabrdagi PF-158-sonli “Oʻzbekiston – 2030” strategiyasi toʻgʻrisidagi Farmoni ijrosini taʼminlash, shuningdek, milliy iqtisodiyotni barqaror rivojlantirishning ilmiy asoslarini chuqur tadqiq etish, mavjud muammolar yuzasidan ilmiy-amaliy taklif va tavsiyalar ishlab chiqish maqsadida tashkil etildi.
Konferensiyada Byudjet-soliq ilmiy tadqiqotlar instituti, Oʻzbekiston Respublikasi Vazirlar Mahkamasi huzuridagi Biznes va tadbirkorlik oliy maktabi, Oʻzbekiston Respublikasi Prezidenti huzuridagi Davlat boshqaruvi akademiyasi, G.V. Plexanov nomidagi Rossiya iqtisodiyot universitetining Toshkent filiali, Kimyo xalqaro universiteti, Toshkent davlat iqtisodiyot universiteti hamda ilmiy-tadqiqot markazi professor-oʻqituvchilari, tadqiqotchilari va doktorantlari, shuningdek, Oʻzbekiston Respublikasi Iqtisodiyot va moliya vazirligi mutaxassislari faol ishtirok etdilar.
Tashkiliy qoʻmita tomonidan konferensiyaga taqdim etilgan ilmiy tezislar koʻrib chiqilib, ularning 135 tasi saralab olindi hamda 4 ta shoʻba boʻyicha konferensiya materiallari toʻplamiga kiritildi.
Anjuman davomida milliy iqtisodiyotni jadallashtirilgan rivojlantirish, barqaror iqtisodiy oʻsish surʼatlarini taʼminlash, moliya tizimi faoliyatini takomillashtirish, investitsiya siyosatining ijtimoiy-iqtisodiy samaradorligini oshirish hamda shahar va qishloq aholisi turmush darajasini mutanosib rivojlantirish kabi dolzarb masalalar muhokama qilindi.
Shuningdek, barqaror rivojlanishning iqtisodiy muammolari, fiskal siyosatning ustuvor yoʻnalishlari, tadbirkorlik muhitini yaxshilash, hududlar iqtisodiy salohiyatidan samarali foydalanish va aholi farovonligini oshirishga qaratilgan ilmiy yondashuvlar yuzasidan fikr almashildi.
Konferensiya doirasida olib borilgan ilmiy munozaralar milliy iqtisodiyot barqarorligini mustahkamlash, iqtisodiy islohotlarning ilmiy-uslubiy asoslarini takomillashtirish hamda amaliyotga yoʻnaltirilgan taklif va tavsiyalar ishlab chiqishga xizmat qildi.
Tadbir yakunida faol ishtirok etgan professor-oʻqituvchilar, tadqiqotchilar, doktorantlar va mutaxassislarga sertifikatlar topshirildi.
