Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida doktorantlar bilan navbatdagi davra suhbati bo‘lib o‘tdi. Yig‘ilishda Markaz direktori, professor S.Xudoyqulov bugungi kunda ilmiy-tadqiqot faoliyatining ustuvor yo‘nalishlari va hozirgi zamon iqtisodiyoti oldida turgan dolzarb masalalar xususida atroflicha ma’lumot berdi. Davra suhbatida doktorantlarning ilmiy-tadqiqot jarayonlarini puxta rejalashtirish, ularni sifatli va o‘z vaqtida amalga oshirish hamda muddatida yakuniy himoyaga olib chiqish bo‘yicha uslubiy tavsiyalar va ko‘rsatmalar berildi, doktorantlarga ilmiy faoliyat uchun yaratilayotgan imkoniyatlarni kengaytirish, moddiy-texnik bazani mustahkamlash, ularning samarali ish olib borishlari uchun zarur shart-sharoitlarni takomillashtirish masalalari ham atroflicha muhokama qilindi. Davra suhbatida doktorantlarning ilmiy-tadqiqot faoliyatida duch kelayotgan masalalarni joyida hal etish, ilmiy rahbarlar bilan ilmiy hamkorlikni kuchaytirish, malakali mutaxassislar va ekspertlar ishtirokida mavzuli ilmiy-uslubiy seminarlar tashkil etish bo‘yicha takliflar bildirildi. “O‘zbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi kelgusida ham doktorantlar bilan muntazam uchrashuvlar o‘tkazishni, ularning ilmiy ijodiy salohiyatini qo‘llab-quvvatlashni hamda milliy iqtisodiyotimiz taraqqiyoti uchun dolzarb g‘oyalar va ilmiy ishlanmalar yaratishni davom ettirishi kelishib olindi.
