Toshkent davlat iqtisodiyot universiteti xuzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi “Demografiya va mehnat bozori” sektori ilmiy hodimlari “O‘zbekistonda demografik dividenddan foydalanish: inson kapitalini rivojlantirish orqali ayollar va yoshlar salohiyatini ro‘yobga chiqarish” mavzusida Demografik barqarorlik bo‘yicha xalqaro konferensiyasida ishtirok etishdi.
Xalqaro konferensiya O‘zbekiston Respublikasi Oliy Majlisi Senati, O‘zbekiston Respublikasi Oila va xotin-qizlar qo‘mitasi, O‘zbekiston Respublikasi Iqtisodiyot va moliya vazirligi, Oila va gender ilmiy-tadqiqot instituti hamda Birlashgan Millatlar Tashkilotining Aholishunoslik jamg‘armasi (UNFPA) hamkorligida tashkil etilgan. Konferensiya O‘zbekistonda demografik dividenddan foydalanishning asosiy imkoniyatlarini aniqlash va o‘rganishga qaratilgan bo‘lib, bu masalalarni siyosatni ishlab chiqishda hisobga olinishiga alohida e’tibor qaratilgan. Tadbirda asosiy eʼtibor yoshlarning imkoniyatlarini kengaytirish, ayollar va qizlarning oʻz salohiyatini toʻliq roʻyobga chiqarishi va shu orqali mamlakat iqtisodiy taraqqiyotiga hissa qoʻshishi uchun shart-sharoit yaratishga qaratildi. Siyosatchilar, ekspertlar va manfaatdor tomonlar o’rtasida muloqotni tashkil etish orqali tadbir barqaror va adolatli iqtisodiy o’sishga hissa qo’shish uchun ushbu asosiy demografik guruhlarni kuchaytirish bo’yicha amaliy taklif va tavsiyalarini ishlab chiqishga imkon berdi.
