Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida direktor Xudoyqulov Sadirdin Karimovich hamda direktor oʻrinbosari Isayev Faxriddin Ikromovich boshchiligida doktorantlar bilan ilmiy faoliyat masalalariga bagʻishlangan uchrashuv tashkil etildi.
Uchrashuv suhbat tarzida oʻtkazilib, unda Markazda mavjud 4 ta ixtisoslik, jumladan, 08.00.02 – “Makroiqtisodiyot”, 08.00.07 – “Moliya, pul muomalasi va kredit”, 08.00.10 – “Demografiya. Mehnat iqtisodiyoti” hamda 08.00.12 – “Mintaqaviy iqtisodiyot” yoʻnalishlari boʻyicha tahsil olayotgan tayanch doktorantlar (PhD), doktorantlar (DSs) va stajyor-tadqiqotchilar ishtirok etdilar.
Muloqot jarayonida doktorantlarning olib borayotgan ilmiy tadqiqot ishlari, dissertatsion mavzularning mamlakatimizda amalga oshirilayotgan iqtisodiy islohotlar bilan uzviy bogʻliqligi, tadqiqot natijalarining amaliy ahamiyatini oshirish masalalari atroflicha muhokama qilindi. Shuningdek, ilmiy tadqiqotlarni zamonaviy metodologiya asosida olib borish, xalqaro tajriba va ilgʻor ilmiy yondashuvlarni qoʻllash, olingan natijalarni nufuzli milliy va xalqaro ilmiy jurnallarda eʼlon qilish zarurligi taʼkidlandi.
Uchrashuvda mamlakatimizda yaratilayotgan qulay ilmiy muhit, davlat tomonidan doktorantlar uchun berilayotgan imkoniyatlar va qoʻllab-quvvatlash mexanizmlaridan samarali foydalanish, tadqiqot ishlarini belgilangan reja asosida tashkil etish hamda ularni oʻz vaqtida yakunlash muhim vazifa ekanligiga alohida eʼtibor qaratildi.
Shuningdek, himoya jarayoniga puxta tayyorgarlik koʻrish, dissertatsiya mazmunini mukammal shakllantirish, taqdimot va ilmiy maʼruzalarni zamonaviy talablar asosida tayyorlash, ilmiy bahs-munozaralarda faol ishtirok etish hamda ekspertlar tomonidan beriladigan tavsiya va eʼtirozlarga oʻz vaqtida va asosli javob qaytarish muhim vazifa sifatida belgilab olindi. Uchrashuv ishtirokchilariga ilmiy rahbarlar bilan yaqin hamkorlikni yoʻlga qoʻyish, markaz qoshida tashkil etiladigan ilmiy seminarlar va muhokamalarda muntazam ishtirok etish orqali ilmiy salohiyatni yanada oshirish boʻyicha tegishli koʻrsatmalar berildi.
Uchrashuv yakunida doktorantlarga ilmiy faoliyatni tizimli va maqsadli ravishda tashkil etish, dissertatsion tadqiqotlarni tasdiqlangan individual rejalar asosida olib borish, tadqiqot jarayonida ilmiy yangilik va amaliy natijalarga erishishga alohida eʼtibor qaratish boʻyicha qator amaliy tavsiyalar berildi. Shuningdek, dissertatsion ishlarini sifatli va belgilangan muddatlarda yakunlash, tadqiqot natijalarini bosqichma-bosqich rasmiylashtirish, ilmiy maqolalarni oʻz vaqtida tayyorlash va nufuzli milliy hamda xalqaro ilmiy nashrlarda eʼlon qilish zarurligi taʼkidlandi.
