Keyingi paytda iqtisodiyotimiz tarmoqlarida klasterlashtirish jarayoni tobora jadallashmoqda. Bu bejiz emas, albatta. Chunki davlatimiz rahbarining tashabbusi bilan amalga oshirilayotgan ushbu yangilanish zamirida ijtimoiy-iqtisodiy sohalarni rivojlantirishdek ezgu maqsad mujassam.
Darhaqiqat, ilg‘or klasterlar sinfining shakllanishi nafaqat bir tarmoq yoki hudud, balki mamlakatimiz iqtisodiyoti ravnaqiga xizmat qiladi, uning raqobatbardoshligini oshiradi. Buning uchun har bir klaster innovasiyaga tayanmog‘i lozim. Bunga ishlab chiqarish va ilm-fan, oliy ta’lim integrasiyasini chuqurlashtirish orqali erishish mumkin. Shu bois O‘zbekiston paxta-to‘qimachilik klasterlari uyushmasi, Toshkent davlat iqtisodiyot universiteti hamda mazkur oliy o‘quv yurti huzuridagi O‘zbekiston iqtisodiyotini rivojlantirishning ilmiy asoslari va muammolari ilmiy-tadqiqot markazi o‘rtasida o‘zaro klasterlarni rivojlantirish bo‘yicha istiqbolli hamkorlik yo‘lga qo‘yilmoqda.
Bugun Toshkent davlat iqtisodiyot universiteti rahbariyati bilan bo‘lib o‘tgan uchrashuvda ushbu hamkorlik munosabatlari ko‘rib chiqildi. Muhokamalar yakunida uyushma, universitet hamda markaz o‘rtasida xorijiy ekspertlarni jalb qilgan holda, beshta yo‘nalishda hamkorlik aloqalarini o‘rnatish bo‘yicha dastlabki kelishuvga erishildi. Bular — Akademik faoliyat, Ilmiy-tadqiqot faoliyati, Halqaro xamkorlik, Innovasion faoliyat, Raqamli texnologiyalar yo‘nalishlaridan iborat.
Birgina akademik faoliyat yo‘nalishidagi aloqalarga to‘xtaladigan bo‘lsak, soha uchun yetuk kadrlar tayyorlash ko‘zda kutilgan yo‘nalishlar ochish, bakalavr va magistrlar uchun ishlab chiqarish va ta’lim tizimini integrasiyasi masalalarini rivojlantirish maqsadida maxsus dastur ishlab chiqish, “Klaster iqtisodiyoti” nomli darslik va o‘quv qo‘llanmalar yaratish hamda o‘quv-uslubiy materiallar majmuasini shakllantirish kabi ko‘plab vazifalar amalga oshirilishi ko‘zda tutilmoqda. Bundan tashqari, qo‘shimcha qiymat zanjiri logistikasi, milliy brendlarni yaratish, marketing va reklama, eksport ko‘nikmalarini oshirishga qaratilgan maxsus trening kurslari tashkil qilinadi.
Umuman olganda, bugun klaster tizimi istiqboli yo‘lidagi yana bir muhim hamkorlikni boshladik. Bu tez orada o‘zining samaralarini bera boshlaydi.
