Toshkent davlat iqtisodiyot universiteti huzuridagi «Oʻzbekiston iqtisodiyotini rivojlantirishning ilmiy asoslari va muammolari» ilmiy tadqiqot markazida 21- yanvar kuni «Oʻzbekiston demograf olimlari» uyushmasining “Oʻzbekiston Respublikasida urbanizatsiya jarayoni holati va istiqbollari” mavzusidagi davra suhbati boʻlib oʻtdi. Unda Toshkent davlat iqtisodiyot universiteti Ilmiy ishlar va innovatsiyalar boʻyicha prorektor i.f.d., professor Abduraxmanova Gulnora Qalandarovna va universitetning professor oʻqituvchilari, ilmiy tadqiqotchilar, “Ijtimoiy fikr” respublika jamoatchilik fikrini oʻrganish markazi direktorining birinchi oʻrinbosari Xojimuхammedov Marat Karimovich, Toshkent Arxitektura va qurilish universiteti professori Usmanov Murodxon Saidmaxmudovich, Oʻzbekiston Respublikasi Iqtisodiyot va moliya vazirligi huzuridagi Urbanizatsiya agentligi xodimi Oktyabirov Umidjon Ravshanbek oʻgʻli va boshqalar ishtirok etishdi.
Davra suhbatini Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy tadqiqot markazi direktori i.f.d., professor Xudoyqulov Sadirdin Karimovich davra suhbatlarida olimlar va ilmiy izlanuvchilarda yangidan – yangi gʻoyalar tugʻilishiga imkon berishi, uyushmaning faoliyati, tashkil etilgandan buyon oʻtkazib kelinayotgan davra suhbatlari haqida qisqacha toʻxtalib davra suhbatini ochib berdi.
Davra suhbatida Oʻzbekiston Respublikasida urbanizatsiya jarayoni tendensiyalari haqida qizgʻin bahs munozaralar olib borildi. Suhbat jarayonida mutaxassislar tomonidan keltirilgan statistik maʼlumotlar ishtirokchilarda qiziqish uygʻotdi. Berilgan savollarga mutaxassis olimlar tomonidan javoblar berildi. Urbanizatsiyani demografik jarayonlar bilan uygʻunlikda olib borilganligi davra suhbatini yanada boyitdi.
Olimlarimiz tomonidan bildirilgan fikrlar, urbanizatsiya sohasida kelgusida amalga oshirilishi koʻzda tutilgan vazifalarni yana aniqlashtirib olishga imkon berdi. Respublikamizning yetakchi olimlari tomonidan bildirilgan takliflar shakllantirilib tegishli tashkilotlarga tahliliy maʼlumotnoma sifatida yuborilishi rejalashtirildi. Bundan tashqari “Oʻzbekiston Demograf olimlari” uyushmasining 2025-yil uchun ish rejasi kelishib olindi.
