Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazida Ilmiy kengashning navbatdagi 6-son majlisi boʻlib oʻtdi. Unda Markazning 2026-yil birinchi yarim yilligidagi ilmiy-tadqiqot faoliyati, ilmiy-texnik loyihalar ijrosi, fundamental tadqiqot natijalari, ilmiy kadrlar tayyorlash jarayoni va tashkiliy masalalar muhokama qilindi.
Majlisda Ilmiy kengash qarorlari ijrosining yarim yillik holati koʻrib chiqildi. Hisobot davrida Markaz Ilmiy kengashining 5 ta majlisi oʻtkazilib, jami 30 ta masala muhokama qilingani qayd etildi. Ushbu masalalar ilmiy loyihalar ijrosi, amaliy va innovatsion tadqiqotlar, ilmiy kadrlar tayyorlash, nashrlar, tijoratlashtirish, xalqaro ilmiy faollikni oshirish va ilmiy natijalarni amaliyotga joriy etish yoʻnalishlarini qamrab oldi.
Shuningdek, yarim yillik faoliyat davomida bir qator monografiyalar, ilmiy ishlar toʻplami va ilmiy-amaliy nashrlarni chop etishga tavsiya berilgani taʼkidlandi. Bu Markazda olib borilayotgan tadqiqotlarning ilmiy jamoatchilikka yetkazilishi va amaliy natijalarga yoʻnaltirilishi borasidagi ishlarning izchil davom etayotganini koʻrsatadi.
Kengashda Markaz sektorlari tomonidan bajarilayotgan ilmiy-texnik loyihalarning yarim yillik hisobotlari ham muhokama qilindi. Moliya-bank tizimi, hududlarni kompleks rivojlantirish, demografiya va mehnat bozori yoʻnalishlaridagi loyihalar doirasida kalendar rejalar ijrosi, ilmiy nashrlar, amaliy takliflar, hisobotlar va joriy etish natijalari koʻrib chiqildi.
Xususan, tijorat banklarining raqamlashganlik milliy indeksini ishlab chiqish, aholi prognozining GAT texnologiyasiga asoslangan xaritasini shakllantirish, hududlarning barqaror iqtisodiy oʻsish strategiyasini ishlab chiqish, eksportga yoʻnaltirilgan ishlab chiqarish zonalarini tashkil etish hamda migratsiya va mehnat resurslariga oid GAT xaritalarini yaratish boʻyicha ishlar Markazning muhim ilmiy-amaliy yoʻnalishlari sifatida eʼtirof etildi.
Majlisda kambagʻallikni kamaytirish va aholi turmush farovonligini oshirishga qaratilgan fundamental loyihaning 3 yillik yakuniy hisoboti ham koʻrib chiqildi. Loyiha doirasida kambagʻallikning ilmiy-nazariy asoslari, byudjet siyosati, ijtimoiy himoya, inson kapitali, aholi daromadlari, isteʼmol savatchasi va hududiy farovonlikni baholashga oid tadqiqotlar amalga oshirilgani qayd etildi.
Ilmiy kadrlar tayyorlash masalasi ham majlis kun tartibida alohida oʻrin oldi. Tayanch doktorantlar, doktorantlar, stajyor-tadqiqotchilar va mustaqil izlanuvchilarning 2026-yil shaxsiy ish rejalari ijrosi boʻyicha yarim yillik monitoring natijalari muhokama qilindi. Monitoringda dissertatsiya ishlarining bajarilishi, ilmiy maqolalar chop etilishi, konferensiyalarda ishtirok etish va ilmiy seminarlarda muhokamadan oʻtish holati tahlil qilindi.
Majlis yakunida sektor mudirlari va loyiha rahbarlariga ilmiy-texnik loyihalar boʻyicha kalendar rejalar ijrosini oʻz vaqtida taʼminlash, hisobotlarni belgilangan tartibda tayyorlash, ilmiy natijalarni amaliyotga joriy etish va nufuzli mahalliy hamda xorijiy jurnallarda maqolalar chop etish ishlarini kuchaytirish vazifalari belgilab berildi.