2026-yil 28-aprel kuni Istanbulning tarixiy Ayasofiya Madrasasi binosida – Fatih Sulton Mehmet Vakif universiteti qoshidagi zamonaviy ilmiy maydonda – «AI in Finance II: AI, Katta Ma’lumotlar va Raqamli Valyutalar – Katta xatarmi yoki kattaroq imkoniyatmi?» mavzusidagi ikkinchi xalqaro ilmiy seminar bo’lib o’tdi.
Tadbir uch hamkor muassasa – Turkiyadagi Fatih Sulton Mehmet Vakif universiteti, Qatardagi Hamad Bin Khalifa universiteti va Toshkent davlat iqtisodiyot universiteti huzuridagi «O’zbekiston iqtisodiyotini rivojlantirishning ilmiy asoslari va muammolari» ilmiy-tadqiqot markazi tomonidan birgalikda tashkil etildi. Seminar «Raqamli Seminarlar» (Digital Workshops) seriyasining tarkibiy qismi sifatida o’tkazildi.
Seminar davomida Turkiyaning yetakchi moliyaviy nashrlari ishtirokidagi maxsus media-panel tashkil etildi. Ilmiy ma’ruzalar quyidagi yo’nalishlarni qamrab oldi: auditda sun’iy intellekt va avtonom agentlarga o’tish jarayoni; markaziy bank kommunikatsiyasi va moliyaviy barqarorlikni AI yordamida muvofiqlashtirish; yangi avlod to’lov protokollari arxitekturasi; islom moliyasida AI; ESG investitsiyalari va yashil energetika moliyasini agent asosidagi modellashtirish.
O’tkazilgan onlayn sessiyada Toshkent davlatiqtisodiyot universiteti huzuridagi «O’zbekiston iqtisodiyotini rivojlantirishning ilmiy asoslari va muammolari» ilmiy-tadqiqot markazi vakillari Xurshid Xudoyqulov, Sirojiddin Abrorov va Fazliddin Sindarovlar O’zbekiston kapital bozorida raqobatni oshirish uchun yangi zaxiralar hajmini baholash bo’yicha ilmiy ishlarini ma’ruza qildilar.
Tashkilotchilar tomonidan xalqaro miqyosdagi yetakchi nashriyotlardan biri – Taylor and Francis Group bilan seminar materiallari asosida kitob nashr etish bo’yicha shartnoma imzolangani ma’lum qilindi. Kitob 2026-yil dekabr oyida chop etilishi rejalashtirilgan.
