2026-yil 26-oktyabr kuni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi Kengashining 10-sonli navbatdagi majlisi boʻlib oʻtdi. Majlisga Markaz direktori, iqtisodiyot fanlari doktori, professor S.K.Xudoyqulov raislik qildi.
Kengash yigʻilishida 2027-yil uchun oliy taʼlimdan keyingi taʼlimga qabul jarayonlari, xalqaro va amaliy ilmiy loyihalarning bajarilish holati, kelgusi yilda oʻtkaziladigan ilmiy anjumanlar hamda Markazning ilmiy-tashkiliy faoliyatiga oid muhim masalalar muhokama qilindi.
Kun tartibidagi birinchi masala yuzasidan Markaz direktorining ilmiy ishlar boʻyicha oʻrinbosari F.I.Isayev axborot berdi. Taʼkidlanganidek, 2027-yil uchun Markazning tayanch doktorantura, doktorantura, stajyor-tadqiqotchilik va mustaqil izlanuvchilik yoʻnalishlariga jami 33 nafar talabgor hujjat topshirgan. Kengashda talabgorlar roʻyxati koʻrib chiqilib, kirish imtihonlarini 2026-yil 25 noyabr kuni tashkil etish, qabul jarayonlarining ochiqligi va shaffofligini taʼminlash boʻyicha tegishli vazifalar belgilandi.
Majlisning asosiy masalalaridan biri Markaz sektorlari tomonidan amalga oshirilayotgan xalqaro va amaliy ilmiy loyihalar faoliyatiga bagʻishlandi. Jumladan, “Iqtisodiyotning innovatsion rivojlanishi: ilmiy asoslari va tizimli ahamiyati” mavzusidagi fundamental loyiha, Yevropa Ittifoqining Horizon Europe dasturi doirasida taqdim etilgan “GENESIS – Green Energy Skills for an Inclusive Society” xalqaro loyihasi, shuningdek, Oʻzbekiston va Rossiya iqtisodiyotining raqamli transformatsiyasi hamda eksportga yoʻnaltirilgan ishlab chiqarish zonasini tashkil etish boʻyicha olib borilayotgan tadqiqotlar muhokama qilindi. Xalqaro ilmiy hamkorlikni kengaytirish, xorijiy tadqiqot muassasalari bilan qoʻshma loyihalarni rivojlantirish va tadqiqot natijalarini amaliyotga tatbiq etish masalalariga alohida eʼtibor qaratildi.
Shuningdek, Kengashda 2027-yilda Markaz tomonidan toʻrtta yirik ilmiy-amaliy konferensiyani oʻtkazish rejalari maʼqullandi. Kengashning turli masalalar qismida sektorlararo ilmiy seminar aʼzolarining yangilangan tarkibi tasdiqlandi, shuningdek, ilmiy tadqiqotlar va dissertatsiya ishlarini tashkil etishga oid masalalar koʻrib chiqildi.
Majlis yakunida muhokama etilgan masalalar yuzasidan tegishli qarorlar qabul qilinib, ularning ijrosini taʼminlash boʻyicha masʼullarga aniq vazifalar yuklatildi. Qabul qilingan qarorlar Markazning ilmiy salohiyatini yuksaltirish, xalqaro tadqiqot hamkorligini mustahkamlash, yuqori malakali ilmiy kadrlar tayyorlash va milliy iqtisodiyotning dolzarb muammolari boʻyicha ilmiy izlanishlar samaradorligini oshirishga qaratilgan.
