Toshkent davlat iqtisodiyot universiteti huzuridagi “O‘zbekiston iqtisodiyotini rivojlantirishning ilmiy asoslari va muammolari” ilmiy tadqiqot markazida joriy yilning 29-oktyabr kuni “O‘zbekiston Respublikasi Demograf olimlari” uyushmasining navbatdagi seminari bo‘lib o‘tdi. Unda O‘zbekiston Respublikasi Kambag‘allikni qisqartirish va bandlik vazirligi, O‘zbekiston Respublikasi Kambag‘allikni qisqartirish va bandlik vazirligi huzuridagi Mehnat bozori tadqiqotlari instituti, Mirzo Ulug‘bek nomidagi O‘zbekiston Milliy Universiteti Iqtisodiy-ijtimoiy geografiya kafedrasi, “Ijtimoiy fikr” respublika jamoatchilik fikrini o‘rganish Markazi, O‘zbekiston Respublikasi Iqtisodiyot va moliya vazirligi, Makroiqtisodiy va hududiy tadqiqotlar instituti, BMT Aholi jamg‘armasining O‘zbekistondagi vakolatxonasi,Toshkent davlat iqtisodiyot universiteti, xorijiy va respublikamizdagi oliy o‘quv yurtlarining professor-o‘qituvchilari, tayanch doktorantlari, mustaqil ilmiy-izlanuvchilar, magistrlar va ushbu sohada tadqiqot olib boruvchi olimlar ishtirok etishdi. Seminarda onlayn tarzida viloyatlardan ham respublikamizning demograf olimlari ham ishtirok etishdi.
Seminarda “Demografiya” ilmiy-ommabop lug‘atini tayyorlash va uni nashr qilish ishlarini amalga oshirish yuzasidan qizg‘in bahs munozaralar olib borildi. Ishtirokchi Boboyev Sh. (“Ijtimoiy fikr” respublika jamoatchilik fikrini o‘rganish markazi xodimi) lug‘atni mobil ilova shaklida tayyorlash va uni keng ommaga jalb qilishning qulay ekanligini taklif sifatida bildirib o‘tdi. Toshpo‘latov A.R. (BMT Aholi jamg‘armasining O‘zbekistondagi vakolatxonasi xodimi) Lug‘at Demografiya portalidagi lug‘at bilan bir xillikda bo‘lishi kerakligini taklif qildi.
Seminarda ikkinchi masala “Urbanizatsiya jarayonlarini boshqarish va aholi punktlari joylanishi” mavzusida davom etdi. Ma’ruzachi professor Zulxumor Nazarovna (Mirzo Ulug‘bek nomidagi O‘zbekiston Milliy Universiteti Iqtisodiy-ijtimoiy geografiya kafedrasi mudiri) ishtirokchilarga o‘zining taqdimotlarini namoyish etdi. Ishtirokchilar o‘zlarini qiziqtirgan savollarga javoblar olishdi. Bundan tashqari uyushmaning keyingi seminar ishlarida bu mavzuga yana to‘xtalishlari, sohadagi muammolarni boshqa tashkilot vakillari bilan birgalikda muhokama qilish zaruratini vazifa sifatida belgilab olishdi.
