2026-yil 1-may kuni Toshkent davlat iqtisodiyot universiteti huzuridagi “Oʻzbekiston iqtisodiyotini rivojlantirishning ilmiy asoslari va muammolari” ilmiy-tadqiqot markazi Kengashining 4-sonli majlisi boʻlib oʻtdi.
Majlisda Markazning 2026-yil II choragida yangi amaliy va innovatsion loyihalar tanlovida ishtirok etishga tayyorgarlik masalalari, yuqori turuvchi tashkilotlarga taqdim etilayotgan ilmiy va analitik ishlanmalar, shuningdek, Markazda faoliyat yuritayotgan “Sektorlararo seminar” hisoboti muhokama qilindi.
Kun tartibining birinchi masalasi boʻyicha sektor mudirlari tomonidan Markazning yangi amaliy va innovatsion loyihalar tanlovlarida ishtirok etishga tayyorgarlik holati yuzasidan axborot berildi. Unda ilmiy faoliyatga oid davlat dasturlari doirasida eʼlon qilinayotgan tanlovlarda Markaz ilmiy salohiyatidan samarali foydalanish, istiqbolli loyiha gʻoyalarini shakllantirish, ularning ilmiy asoslanganligi va amaliy ahamiyatini oshirish masalalariga alohida eʼtibor qaratildi.
Ikkinchi masala doirasida Markaz tomonidan yuqori turuvchi tashkilotlarga taqdim qilinayotgan ilmiy va analitik ishlanmalar toʻgʻrisida maʼlumot berildi. Maʼruzachilar tomonidan tayyorlanayotgan tahliliy materiallar, ilmiy takliflar va amaliy tavsiyalarning mazmuni, ularning iqtisodiy islohotlar jarayonidagi ahamiyati hamda davlat boshqaruvi organlari faoliyatida foydalanish imkoniyatlari muhokama qilindi.
Shuningdek, majlisda Markazda faoliyat yuritayotgan “Sektorlararo seminar” boʻyicha hisobot tinglandi. M. Umarova seminar doirasida amalga oshirilgan ishlar, sektorlar oʻrtasida ilmiy hamkorlikni kuchaytirish, tadqiqot natijalarini muhokama qilish va yosh tadqiqotchilarning ilmiy faolligini oshirish borasida olib borilayotgan ishlar haqida axborot berdi.
Kun tartibidagi turli masalalar boʻyicha F.I. Isayev tomonidan Markaz faoliyatini yanada takomillashtirish, ilmiy-tadqiqot ishlari samaradorligini oshirish, loyihalar ijrosini muvofiqlashtirish hamda tashkiliy masalalar yuzasidan takliflar bildirildi.
Majlis yakunida kun tartibidagi masalalar yuzasidan tegishli qarorlar qabul qilindi. Qabul qilingan qarorlarda Markazning ilmiy-tadqiqot faoliyatini yanada rivojlantirish, amaliy va innovatsion loyihalarda ishtirokini kengaytirish, yuqori turuvchi tashkilotlar uchun tayyorlanayotgan ilmiy-analitik materiallar sifatini oshirish hamda sektorlararo ilmiy hamkorlikni kuchaytirish vazifalari belgilab olindi.
Mazkur Kengash majlisi Markazda ilmiy izlanishlar samaradorligini oshirish, tadqiqot natijalarining amaliy ahamiyatini kuchaytirish va iqtisodiy islohotlarni ilmiy jihatdan qoʻllab-quvvatlash borasida muhim ahamiyat kasb etdi.
